Dita e
607

Ish-banorët e Big Brother: Lojtarët e rinj janë si kukulla

bigbrotheralbaniaNjë ndër spektaklet më të ndjekura të ekraneve shqiptare sapo ka filluar. Të gjithë janë sy e veshë. Kush hyri? Kush do dalë këtë javë? Kush luajti mirë e kush keq. Gjithë sy e vesh janë edhe ata, banorët e dikurshëm të shtëpisë. Të paktën natën e hapjes nuk e kanë humbur për asnjë arsye në botë.

Të vendosur përballë lojtarëve të rinj, si lojtarë të stërvitur që janë, i kanë gjetur tanimë ca pika të forta e ca të dobëta, ca personazhe që i kanë pëlqyer që në fillim e ca të tjerë që nuk u kanë rënë ende në sy. Mbi të gjitha e kanë bërë edhe një krahasim: cilët janë më të mirë? Ata që ikën apo këta që erdhën? Torosi i “BigBrother 4” dhe Ermali e Françeska të “Big Brother 5” japin përshtypjet e para për spektaklin, që sapo ka filluar.

Torosi: Ne ishim të pazëvendësueshëm
I ka ndjekur me vëmendje që në natën e parë. Por jo gjithçka i ka pëlqyer në mënyrën se si janë sjellë banorët e rinj të “Big Brother”-it sapo kanë vënë këmbën në shtëpi. Torosi mendon se duhet të ishin pak më entuziastë për një shtëpi aq moderne. Siç mendon se banorët në spektaklin ku ai ka bërë pjesë kanë qenë më interesantë. Por mendon edhe ca gjëra të tjera Torosi. Që i thotë hapur, siç ka bërë gjithmonë.

Po e ndjek “Big Brother”-in këtë sezon?
Po, po e ndjek sepse kam qenë pjesë e këtij reality dhe nga BB 4 dhe protagonizmi im në BB 5 më shtyn akoma më shumë ta ndjek më shumë këtë shoë, duke pasur besim te njerëzit që e drejtojnë

Njeh ndonjë prej banorëve?
Jo, për fat të keq nuk njoh asnjërin nga banorët, edhe pse do më pëlqente t’i njihja.

Si t’u dukën kur i pe për herë të parë?
Prisja më shumë nga këta, se vetë ambienti i shtëpisë është një privilegj, i krahasueshëm me një hotel me 7 yje. Hyrja e tyre ishte shumë e ftohtë, sikur nuk u bënte përshtypje asgjë, sikur këta vinin nga Big Brother Dubai. U ulën atje sikur po qanin hallet. Teksa i shihja, në ndonjë moment më dukej sikur kishin ardhur për ngushëllim aty. Nuk arrij të kuptoj nëse janë emocione apo vallë indiferentizëm? Dhe asnjë nga banorët nuk kishte dialog me Arbanën. Shumë herë e nxirrnin bllof në të folur, shumë të hutuar.

Po tani që po i ndjek?
Nuk e ndjek përditë e për çdo orë, por sa ulem përpara televizorit e ndjek. Ç’të shikoj, nuk kanë filluar akoma nominimet, nuk kanë filluar akoma debatet. S’e di… ia lëmë kohës, t’u japim hapësirë dhe atyre dhe të shikojmë se ku do arrijnë.

Mund të dallohen që në javën e parë se cilët janë ata që kanë natyrë protagoniste, që kanë gjasa të rezistojnë gjatë?
Natyrë protagonisti, për eksperiencën time si brenda dhe jashtë, ose për atë që kemi parë në televizionet evropiane, do më pëlqente që binjakët të bëjnë një lojë, dua që të krijojnë një lidhje aty brenda dhe do ishte shumë e lezetshme kjo lidhje midis dy personave me të njëjtën fytyrë, dhe nëse ndodh, besoj se do kenë vëmendjen e publikut. E dashur gazetare, nuk është e lehtë të marrësh duartrokitje nga publiku shqiptar e jo më ta gozhdosh atë në televizion. Se njerëzit janë të lodhur nga politika dhe kronikat e zeza. Përpara 22 vjetësh, kur unë lashë Shqipërinë, i lashë duke parë “Shamikuqen” dhe i gjeta po me Ezelin. Këta banorë duhet t’i japin diçka të veçantë këtij populli. Pas daljes time nga BB 4 pashë një publik që e takoja në jetën e përditshme dhe më kapnin rrugës më thoshin: ajo e tha ashtu, ai u përgjigj kështu. Në taksi, në Facebook, informacioni më vinte shpesh. Plus që shikoja një publik që ishte në korrent dhe i elektrizuar për BB 4. Shpresojmë që dhe këta t’ia arrijnë.

Kush prej tyre e ka filluar lojën tashmë?
Besoj se janë ende në fazën e njohjes të lëvizjeve. Nuk e kanë filluar akomalojën. Loja fillon kur fillojnë nominimet, aleancat, mosmarrëveshjet. Me fillimin e nominimeve fillon dhe egoja. Deri tani po qëndrojnë si motra e vëllezër.

Ka ndonjë prej tyre që të ngjan me dikë nga personazhet e “Big Brother”-it ku ti ke bërë pjesë, por edhe me të viteve të tjera?
Po. Kjo Elena, biondja, është versioni Bertina e BB 3, edhe pse Bertina është më e bukur, më sensuale. Kurse me BB 4 nuk ngjan asnjëri, sepse ne ishim ujqër dhe ujkonja.

Po të bësh një krahasim mes “Big Brother”-it ku ti ke qenë pjesë dhe këtij të sivjetshmit, kush mendon se kanë qenë banorët më tërheqës për t’u ndjekur, ju apo këta?
Nuk mund të afrohen. Ne ishim populli, ne ishim politika, ne ishim të pazëvendësueshëm. U uroj talenteve të reja që kanë forcën dhe besimin në këtë reality, të bëhen dikush, të arrijnë diçka.

Ke krijuar ndonjë simpati për ndonjërin prej tyre?
Simpati nuk kam krijuar. Thjesht mua më pëlqen spektakli. Dua të shikoj shoë. Dua që ajo hapësirë që ata kanë kërkuar të më bindë ose më mirë që ata të bindin publikun që nesër do t’u kërkojë autografe dhe foto. Me pak fjalë, pres të bëjnë diçka që të tjerët s’e kanë bërë akoma.

E ke krijuar ndonjë ide se kush mund ta fitojë?
Është shpejt ta themi. Njëri nga binjakët ka mundësi ta fitojë, por ama duhet shumë punë, duhet talent, duhet që kur të flasësh të të dëgjohet zëri, që të të kuptojë çdo njeri, si në veri dhe në jug, të të kuptojnë të gjithë. Mos harroni, nuk është e lehtë të bësh për vete shqiptarët, duhet punë.

Për çfarë të ka shërbyer “Big Brother” ty?
Për shumë e shumë gjëra. Arrita të njihja shqiptarët intelektualë, persona të politikës, ambasadorë, qytetarë, fshatarë, persona që vuajnë dënime dhe që kur më shihnin mua shihnin vetveten dhe që i falënderoj, se në çdo vend ku kam qenë dhe jam pritur siç e ka zakon shqiptari me bujarinë e tij, jam kënaqur. Kot nuk thonë: më përpara puno për emrin, pastaj do jetë emri që do punojë për ty.

Nëse do ktheheshe pas në kohë, do hyje sërish?
Normal plako! Kisha 22 vjet që ëndërroja të dilja përpara telekamerave dhe ata ma dhanë mundësinë që të hyja i pari. I falënderoj dirigjentët që patën besim te videoklipi im dhe te energjitë e mia, që më lejuan të hyja i pari. Meqë nuk hyj dot më, do më pëlqente të përfshihesha në ndonjë program tjetër televiziv.

Ermali: Këta janë kukulla
Nuk ka qëndruar indiferent as Ermal Merdani, ish-banori i diskutuar i “BigBrother 5”. E ka ndjekur aty-këtu spektaklin që është ende në javën e parë. Edhe pse jo me sy të mprehtë, i ka kushtuar vëmendje reality show-t, pjesë e të cilit ka qenë një vit më parë. Sekretet nuk i kanë lënë shije dhe aq të mirë. Sepse…

Po e ndjek “Big Brother”-in këtë sezon? Të them të drejtën nuk e kam ndjekur. Vetëm hapjen e spektaklit kam parë, ndërsa tani s’po e ndjekdot, se kam impenjime të tjera, si shkolla, puna.

Njeh ndonjë prej banorëve?
Këtë vit njoh dy banorë, që janë Elena dhe Johana. I njoh të dyja, kemi shoqëri dhe shpresoj të arrijnë sa më lart në këtë spektakël.

Si t’u dukën kur i pe për herë të parë?
Kur i pashë më pëlqyen nga mënyra si ishin veshur. Tani është fillimi dhe s’jap dot një opinion të saktë, në javët në vazhdim mund të jap një opinion.

Po tani që po i ndjek?
Tani që po i ndjek janë mire si fillim. Me kalim e kohës edhe ata kanë për të ndryshuar, sepse duhet të sillesh sipas rrjedhës së lojës. Në fillim gjithmonë je më fleksibël me gjërat që ndodhin dhe personat që të rrethojnë. Pastaj më vonë fillon dhe bën lëvizjet që do për lojën.

Mund të dallohen që në javën e parë se cilët janë ata që kanë natyrë protagoniste, që kanë gjasa të rezistojnë gjatë?
Nuk mund të jap një opinion. Pas dy javësh do duken gjërat, sepse do ketë dhe prurje nga jashtë dhe do jetë një garë akoma më e bukur dhe aty do spikasin personat që janë të aftë.

Kush prej tyre e ka filluar lojën tashmë?
Nuk e di me saktësi, edhe për faktin se unë s’po e ndjek, por është fillimi. Loja fillon pas një muaji, për mendimin tim.
Ka ndonjë prej tyre që të ngjan me dikë nga personazhet e “Big Brother”-it ku ti ke bërë pjesë, por edhe me të viteve të tjera?
Është normale. Që të gjithë konkurrentët që hyjnë e kanë ndjekur “BigBrother”-in në vite dhe secili prej tyre do marrë diçka nga personazhet e atyre edicioneve, sepse do që të perfeksionojë lojën e vet. Por në javët në vazhdim do duken dhe ata individë që kanë marrë mënyrën e lojës së banorëve nga edicionet e kaluara.

Po ndonjë që përpiqet të imitojë ndonjë nga banorët e suksesshëm?
Nuk e di, sepse s’i kam parë akoma dhe s’mund të jap një opinion. Është ende fillimi, të gjithë janë miqësorë me njëri-tjetrin, më vonë do fillojë loja.

Po të bësh një krahasim mes “Big Brother”-it ku ti ke qenë pjesë dhe këtij të sivjetshmit, kush mendon se kanë qenë banorët më tërheqës për t’u ndjekur, ju apo këta?
Secili edicion ka personazhet e veta, por unë mendoj që ne kemi qenë më të spikatur. Sepse ne s’kemi hyrë me sekrete. Kemi qenë të lirë të veprojmë ashtu siç e kemi menduar, kurse këta, për mua, janë aktorë ose kukulla, që do t’i mësojnë dhe do përpiqen të kuptojnë atë që po bëjnë. Ky është ndryshimi i parë dhe kryesor: ne kemi qenë pa sekrete, ndërsa këta janë aty për të aktruar.
Ke krijuar ndonjë simpati për ndonjërin prej tyre?

Akoma jo, sepse s’i kam ndjekur, për shkak të impenjimeve të tjera.
E ke krijuar ndonjë ide se kush mund ta fitojë?
Nuk e di, sepse është shpejt. Po unë mendoj që këtë vit do ta ftojë një femër, por s’e di nëse do jetë personazh i tanishëm apo ndonjë që do futet në vazhdim.

Për çfarë të ka shërbyer “Big Brother” ty?
Për shumë gjëra, por duhet të dish se çfarë t’i marrësh këtij spektakli. Duhet të dish ta reklamosh veten. “Big Brother” –i është një trampolinë e mirë për ata që kanë objektiva. Unë, për shembull, kam televizionin dhe tashmë jam pjesë e tij; punoj tek “Top Channel”. Për mua “Big Brother” është një reklamim i mirë për çdo individ që hyn aty dhe ka objektiva.

Nëse do ktheheshe pas në kohë, do hyje sërish?
Absolutisht që po. Do hyja dhe do veproja ashtu siç kam qenë. Më pëlqen të jetoj me njerëz që s’i njoh dhe akoma më bukur kur duhet të zbulojmë sekrete, siç janë këta të këtij edicioni, që janë kukulla, jo me bateri, por me telekomandë zëri J.

Françeska: Uroj të kënaqen dhe të dashurohen
Vajza bukuroshe e edicionit të kaluar ka përjetuar thuajse të njëjtat ndjesi atë natë teksa shihte nga ekrani banorët e rinj të hynin brenda në shtëpi. Është emocionuar, sepse ajo e di mirë se ç’do të thotë të kapërcesh pragun e shtëpisë së vëzhguar

Po e ndjek “Big Brother”-in këtë sezon?
Të them të drejtën, për shkak të punës, s’e ndjek shumë. Veç nga pak në internet dhe normalisht që kam parë natën e hapjes së spektaklit.

Njeh ndonjë prej banorëve?
Po, njoh Elenën, nga disa miq të përbashkët.

Si t’u dukën kur i pe për herë të parë?
Siç isha dhe unë vetë, plot emocione dhe kurajë për të ecur përpara.

Mund të dallohen që në javën e parë se cilët janë ata që kanë natyrë protagoniste, që kanë gjasa të rezistojnë gjatë?
Jo, absolutisht. Pas tri javëve shihen paksa protagonistët, kurse pas muajit të parë, rezistentët.

Kush prej tyre e ka filluar lojën tashmë?
Me sa kam parë, të gjithë duan të luajnë, por “Big Brother” s’kuptohet me një javë. Janë thjesht disa ditë studimi dhe përgatitje me terrenin.

Ka ndonjë prej tyre që të ngjan me dikë nga personazhet e “Big Brother”-it ku ti ke bërë pjesë, por edhe me të viteve të tjera?
Jo, s’më ngjan njeri.

Po të bësh një krahasim mes “Big Brother”-it ku ti ke qenë pjesë dhe këtij të sivjetshmit, kush mendon se kanë qenë banorët më tërheqës për t’u ndjekur, ju apo këta?
S’mund ta bëj këtë krahasim, se i bie të dukem natyrë xheloze. Unë i dua fort konkurrentët e vjetshëm. Do t’i dua edhe këta të sivjetshmit për iniciativën, sepse asnjë prej njerëzve jashtë s’i kupton dot siç mund t’i kuptojmë ne. Duan veçse t’i gjykojnë. Ne e kuptojmë vërtet, pas një kohe qëndrimi, që s’është e lehtë. Uroj që të gjithë të luajnë pastër, të kënaqen, dashurohen, po pa kaluar vlerat e moralit.

Për çfarë të ka shërbyer “Big Brother” ty?
Më ndihmoi për t’u bërë më e fortë në jetë dhe më thelloi më tepër njohurinë mbi gjithçka. /mapo/